八友問消息靈通人士：我等三四月先後打咗一兩劑疫苗勇士，可唔可以參加紐約彩券抽奬活動？答覆係：可能只供最近打針人士抽奬，不過我會深入調查下，再講你知。但已經好幾日，仲未有消息，睇來冇咗希望。俗語話「人不為己，天誅地滅」，州長葛謨日前宣佈，為鼓勵更多紐約客打疫苗而設嘅「Vax&Scratch」彩票活動，將會增加10個新地點，俾更多人有機會贏到500萬元獎金。此外，州府亦準備50份州立大學全額獎學金，以鼓勵12至17歲之兒童同青少年接種新冠疫苗。

雖然抽奬有如「跑馬射蚊鬚」咁困難，但總有個希望，況且呢個希望有利於自己健康防疫，「人生滿希望」，未打疫苗者值得嘗試。若果可以，八友打多一針，參加抽奬，亦無妨。美國多個州為增加民眾打針率，已紛紛訂立打針抽奬活動。俄亥俄州兩個禮拜前已推出打疫苗大抽獎，果然吸引大批躍躍欲試者打針，又果然冇呃人，第一輪抽獎幸運兒上個周三出爐：有個女工程師贏得100萬元，另一少年則喺同一活動嘅獎學金抽獎中，贏得大學獎學金。

據新聞報導，香港接踵新冠疫苗率偏低，因此出現疫苗過剩，要送俾其他地方尷尬問題，特政府急得跳腳，乃千方百計谷針，多個企業響應政府號召；送機票、贈酒店住宿，送景點入場券，更有地產商贈千萬元豪宅，凡打針者皆有機會抽奬。八友幾個禮拜前微信香港侄女：你哋打咗疫苗未？佢最初表示仲未打，但遲早會打。之後說：「香港傳媒係咁報導有人打針後去咗見上帝，佢仲係擔心緊。」八友覺得，歐美亦有人打咗針後唔舒服或番番舊時嗰度，但媒體都係報一報，如果唔係因疫苗致命，都唔會報導。但香港媒體則日講夜講，語不驚人死不休，自然嚇親其他未接踵人士。口依家推出大抽奬，係想扭轉頹勢。八友忽然有想番香港參加免疫抽奬活動，至於有冇資格，明日問下香港駐紐約辦事處至得。