八友鍾意懷舊，有時會上網睇下1960年代香港嘅粵語長片，例如有劇情，演員好嘅「金粉世家」、「朱門怨」等，發現有啲情節同現代一啲家庭不謀而合，好似有日走下坡嘅有錢大家庭，家中話事人盧敦有兩三個仔女，其中大仔張活游夫婦持家有道，想幫助老爸復興家業。但細仔姜中平係花花公子，喺梨園娶咗個「洗腳唔抹腳」花旦仔。兩夫婦不事生產都算嘞，點知佢哋仲想早啲分身家，搵埋外面人向家庭施壓，搞到老爺幾乎嘔血，但家醜唔想外揚，有咁密冚咁密。

讀者有冇發覺呢類家族悲劇好熟口面呢？冇錯，早排八友睇家吳楚帆等主演嘅「家」、「春」、「秋」之後，猛然想起：「巴金原來寫穿越劇，未卜先知90年後英國皇室那事兒。」哈理王子年青時已經係不覊少年，到稍為識得人情細故，要娶老婆之後，卒之左揀右揀，揀咗個離過婚嘅美囯演藝圈叫梅根嘅明星仔，仲聽話聽教。梅根係個心高氣傲之人，不甘屈居大伯菲利普夫婦之下，於是唆擺老公身立門戶，拎住英皇室親王名號，跟佢番美國搵食，一定錢財跟住來。哈理為妻命是從，甘願被牽住鼻哥走，仲周時伸大手板問老豆要錢。脫籍乃大逆不道之事，查理斯皇儲一於錢財封鎖。梅根於是出主意，接受美電視大主持訪問爆料，尋謀財之路；道出要生要死嘅「心理歷程。」逼宮絕技，一時搏得天下同情，唔少人同掬同情之淚。內心悲苦嘅何止菲利普夫婦及王儲，更有年近百歲嘅嫲嫲女皇陞下。

尚幸天下仲有睇唔過眼正義之士。聽講，每日都有唔少慰問信寄俾女皇同菲利普，安慰佢，據悉，女王高興家族喺艱難時刻收到支持佢嘅信。公道自在人心，梅根嘅老爸、家姐等都不值所為，斥梅根丟家庭面子。根據輿觀調查公司（YouGov）民意調查，哈里同梅根嘅支持率喺專訪後直線下降，但女皇支持率仍然好高。而仲有一個笑爆咀嘅消息，就係有說梅根有意竟選下任美國總統。想重出江湖嘅特朗普點睇，佢話：「挑！講佢都嗮口水。」八友倒想傳說成真，大家以為呢！