後生仔傾下偈，乃係交友之道。但日前喺法拉盛則發生「富二代」唐人後生仔爭車位鬧劇，期間更出現飛車撞入第一日開張嘅餅店，好彩現場民眾好彩，冇傷亡報告，若果一個唔好彩，冇眼睇。八友收到幾個朋友微信，以現場直擊，介紹事件経過。首先係兩個金髮後生仔喺街邊扭打，另有一個黑衣人趨前想幫拖，點知出現一個揸住棒球棍嘅走上前，使出獨孤棍法，雙方且戰且退。眼看棍法犀利，黑衣人大怒，氣冲冲走番上奧迪車，駛出一個漂亮掉頭，獨孤少俠唔識死，揸住條棍撲車頭，黑衣人諗都唔諗，直衝過去，連人帶車，飛入云寶餅屋，「砰鈴嘭冷」，玻璃碎滿一地，「係咪拍戲呀！咁刺激。」呢個時候，黑衣人好似「終結者」咁走出店外，但可能唔知自己咁勇猛，面色陣紅陣青。至此，警方到場執手尾。

八友睇完視訊，為現場「演員」同觀眾抹一額汗，云寶餅店新張，疫情關係，唔方便搵舞龍舞獅，點知有唔識「好友」以另類嘅方式賀佢開張，可惜刺激過頭。你話如果店內有客，分分鐘出人命也。友人阿風視訊說，四個後生仔揸嘅係奧迪、寶馬靚車，所以肯定係富二代。事後市議員顧雅明到場瞭解，有目擊全過程嘅大叔說，雙方係因為爭車位而引發事故，奧迪快一秒駛入，寶馬唔順氣，兩個車主落車理論，卒之打起上來。議員問「都係華人？」「當然，老番唔會咁失禮人。」大叔答。「阿叔，你係乜人，美國人？」有個路人甲唔忿大叔針對自己人。「我係乜人關你乜事？」大叔發火。

大叔係「長他人志氣，滅自己威風。」應要打40大板。資料顯示，老外年青人喺街道鬥毆，無日無之，棒球棍打完波就打人，有時出刀仔，更離譜嘅係拔槍相向，好似西部牛仔片咁。如果認為八友誇大，不妨喺周未組團到曼哈頓上城一日遊。總之，新冠疫情肆虐，任何人都頂住條氣，可以理解，但唔能夠咁樣發洩。