八友去年夏天曾到倫敦旅遊，喺白金漢宮外圍參觀，亦曾進入維多利亞女王深宮參訪，驚佩王宮建設之偉大，古董畫作數量之豐富，但有一個疑問，住喺呢種地方，你會快樂咩？中國古語“一入侯門深似海”，意思好明顯，就係嫁入王侯將相，甚至有錢人家，雖然錦衣肉食，但有種種規則框條，“寒天飲冷水，點點到心頭”，係唔係快樂，只有自己感受得到。

　　八友咁多口水，係因為英國皇位第六繼承人哈里王子同佢老婆梅根，周前突然宣布從皇室“高級成員”角色退落來，今後半年喺英國，半年喺北美洲，佢哋一家三口并希望財政獨立。呢個八卦震撼彈，打到英國王室灰頭土臉，狗仔隊歡呼萬歲，紛紛挖料作料，例如報導哈理同大佬威廉王子為此事“吵大鑊”，搞到佢哋兩兄弟要發佈聯合聲明否認。最嬲嘅莫如近百歲嘅英女王夫婦同哋老爸查理斯王儲，覺得佢哋太任性，令王室難堪。不過，有人認為已故戴安娜王妃一定會報夢俾未見過面慨媳婦梅根，大讚做得好。根據八友民意調查所得，脫離王室事件始作俑者，非梅根莫屬。

　　呢位好萊塢小明星從灰姑娘變小鳳凰之後，由於言行都同王室格格不入，已成狗仔隊最受歡迎人物，不斷對佢哋夫婦追訪，無所不用其極，令到梅根不勝其煩，不勝其擾，可能覺得如果繼續落去，佢唔死我死，為咗唔想做“戴安娜第二”，於是向老公攤牌，要求離開王室。哈里愛妻情切，加上有咗愛情結晶，又想起祖輩愛德華八世1936年連王帝都放棄，目的係迎娶曾離過兩次婚嘅美國名媛辛普森夫人，赢得“不愛江山愛美人”美譽。橫掂自己都冇希望做皇上，何不學愛德華八世，瀟灑走一回呢！

　　八友覺得，人各有志，事各有因，英皇室放哈里夫婦一馬，可能係一件好事也？